News Update

ಕೊರೊನಾ ಕಾಳಾಚಿ ಉಬ್ಗೊಣ್ ವಿಸ್ರಾಂವ್ಕ್ ಶಕ್ತಿನಗರಾಚ್ಯಾ ಕಲಾಂಗಣಾಂತ್ ಚಲ್ಲಲೆಂ ಮ್ಹಯ್ನ್ಯಾಳ್ಯೆ ಮಾಂಚಿಯೆಚೆಂ 227 ವೆಂ ಕಾರ್ಯೆಂ ಕುಮ್ಕೆಚೆಂ ಜಾಲೆಂ. 06-12-20 ವೆರ್ ಆಯ್ತಾರಾ ಸಾಂಜೆರ್ 6.30 ವೊರಾರ್ ಕೊಂಕ್ಣೆಚೆಂ ಪ್ರಮುಖ್ ಸಾಂಸ್ಕೃತಿಕ್ ಸಂಘಟನ್ ಮಾಂಡ್ ಸೊಭಾಣಾನ್ ಯೆವ್ಜಿಲ್ಲ್ಯಾ ಹ್ಯಾ ಕಾರ್ಯಾಕ್ ಪ್ರೇಕ್ಷಕಾಂನಿ ಭರ್ಲ್ಲಿ ಉಗ್ತಿ ವೆದಿ ಸಾಕ್ಸ್ ಜಾಲಿ.

ಸುರ್ವೆರ್ ಮಂಗ್ಳುರ್ಚೊ ಪ್ರಖ್ಯಾತ್ ಸಿ.ಎ. ಆನಿ ಸಂಗೀತ್ ಪ್ರೇಮಿ ಒಲ್ವಿನ್ ರೊಡ್ರಿಗಸ್ ಹಾಣಿಂ ಘಾಂಟ್ ಮಾರುನ್ ಕಾರ್ಯಾಕ್ ಚಾಲನ್ ದಿಲೆಂ. ವೆದಿರ್ ಅಧ್ಯಕ್ಷ್ ಲುವಿ ಪಿಂಟೊ, ಸಂಘಟಕ್ ಸ್ಟ್ಯಾನಿ ಆಲ್ವಾರಿಸ್, ಕಾರ್ಯದರ್ಶಿ ಕಿಶೋರ್ ಫೆರ್ನಾಂಡಿಸ್ ಹಾಜರ್ ಆಸ್ಲ್ಲೆ.

ಸುಮೇಳ್, ಕಲಾಕುಲ್, ನಾಚ್ ಸೊಭಾಣ್, ನ್ಯೂಸ್ಟಾರ್ ಬ್ರಾಸ್ ಬ್ಯಾಂಡ್ ವಾಮಂಜೂರ್ ಆನಿ ಆಲ್ವಿನ್ ಬಜ್ಪೆ ಪಂಗಡ್ ಅಶೆಂ ಒಟ್ಟುಕ್ 75 ಕಲಾಕಾರಾಂನಿ ಅರುಣ್ರಾಜ್ ರೊಡ್ರಿಗಸಾಚ್ಯಾ ಪರಿಕಲ್ಪನೆಂತ್ ಉದೆಲ್ಲೆಂ `ಯೆವಾ ನಾಚಾ ತೆಂಚಾ ವಾಂಗ್ಡಾ' ಕಾರ್ಯೆಂ ಸಾದರ್ ಕೆಲೆಂ. ಹಾಂತುಂ ಕ್ರಿಸ್ಮಸ್ ಸಂಬಂಧಿ ಗಿತಾಂ, ನಾಚ್, ನಾಟ್ಕುಳೊ, ಬ್ಯಾಂಡ್, ಕ್ರಿಸ್ಮಸ್ ಖೆಳ್ ಆಸುನ್ ಲೊಕಾಮನಾಂ ಜಿಕ್ಚ್ಯಾಂತ್ ಸುಫಳ್ ಜಾಲೊ.

ಹ್ಯಾ ಕಾರ್ಯಾಚೆಂ ಸಂಗೀತ್ ನಿರ್ದೇಶನ್ ಎರಿಕ್ ಒಝೇರಿಯೊ, ನಾಟಕ್ ನಿರ್ದೇಶನ್ ವಿಕಾಸ್ ಲಸ್ರಾದೊ ಆನಿ ನಾಚ್ ಸಂಯೋಜನ್ ರಾಹುಲ್ ಪಿಂಟೊನ್ ಕೆಲ್ಲೆಂ. ಪ್ರೇಕ್ಷಕಾಂಕ್ ಕುಸ್ವಾರ್ ವಾಂಟ್ಲೊ.