News Update

``ಮ್ಹಜಿ ನಾಚ್ಪಾ ಸುರ್ವಾತ್ ಮಾಂಡ್ ಸೊಭಾಣಾಚ್ಯಾ ನಾಚ್ ಸೊಭಾಣಾಂತ್ ಜಾಲ್ಲಿ. ಮ್ಹಜ್ಯಾ ಯುವ ಪ್ರಾಯೆಚಿಂ ಆಮೊಲಿಕ್ ಆಟ್ ವರ್ಸಾಂ ಬಾಯ್ಲಾ ಶಿಕುಂಕ್ ಆನಿ ನಾಚುಂಕ್ ಖರ್ಚಿಲ್ಯಾಂತ್. ಪಾಶ್ಚ್ಯಾತ್ಯ್ ನಾಚ್ ಶಿಕುಂಕ್ ತುಮ್ಕಾಂ ಜಾಯ್ತೆ ಸಂಸ್ಥೆ ಮೆಳ್ತಿತ್. ಪೂಣ್ ಲೋಕ್ ನಾಚ್ ಆನಿ ಬಾಯ್ಲಾ ಶಿಕಜೆ ತರ್ ಮಾಂಡ್ ಸೊಭಾಣಾ ತಸಲ್ಯಾ ಸಂಸ್ಥ್ಯಾಂಕ್ ಯೇಜೆ. ಹಾಂಗಾ ಶಿಸ್ತೆಚಿ ತರ್ಬೆತಿ ತುಮ್ಕಾಂ ಮೆಳ್ತಾ. ತುಮ್ಚೆಂ ಬರೆಂ ಜಾಂವ್'' ಮ್ಹಣ್ ಫಾಮಾದ್ ನಾಚ್ ಸಂಯೋಜಕ್ ಆನಿ ನಾಚ್ಪಿ ಪ್ರಮೋದ್ ಆಳ್ವಾ ಮ್ಹಣಾಲೊ. ತೊ 19.11.2024 ವೆರ್ ಕಲಾಂಗಣಾಂತ್ ಚಲ್'ಲ್ಲ್ಯಾ ಕಾರ್ಯಾಂತ್ ಫುಲಾಂ ಮಧ್ಲಿಂ ಪಾಂಯ್ಜಣಾಂ ಕಿಣ್ಕಿಣಾವ್ನ್, `ಬಾಯ್ಲಾ-ಹೊಪ್ ನಾಚ್ ತರ್ಬೆತಿ' ಉಗ್ತಾವ್ನ್ ಉಲಯ್ತಾಲೊ.

ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರ್ ಉಲೊವ್ನ್, ಸುಮೇಳ್ ಆನಿ ಕಲಾಕುಲ್ ಜಿವಾಳ್ ಆಸಾತ್. ಆತಾಂ ಹಿ ತರ್ಬೆತಿ ಸುರು ಕರುನ್ ನಾಚ್ ಸೊಭಾಣ್'ಯಿ ಜಿವಾಳ್ಳಾಂ. ತುಮಿ ಹುಮೆದಿನ್ ಆಯ್ಲ್ಯಾತ್. ಮಿನತ್ ಘಾಲಿಜೆ, ಶಿಸ್ತೆನ್ ಶಿಕಜೆ. ಹಾಂಗಾ ಶಿಕ್ಲ್ಯಾ ಉಪ್ರಾಂತ್ ಫುಡೆಂಯ್ ಚಡಿತ್ ತರ್ಬೆತಿ ಜೊಡಾ ಆನಿ ನಾಚ್ ಸಂಸಾರಾಂತ್ ನಾಂವ್ ಜೊಡಾ ಮ್ಹಣ್ ಬರೆಂ ಮಾಗ್ಲೆಂ.

ಪ್ರಸ್ತಾವಿಕ್ ಉಲೊವ್ಪ್ ದಿಲ್ಲ್ಯಾ ನಾಚ್ ಸೊಭಾಣ್ ಮುಖೆಲಿ ರಾಹುಲ್ ಪಿಂಟೊನ್ ನಾಚ್ ಸೊಭಾಣ್ ಸುರು ಜಾಲ್ಲಿ ಆನಿ ವಾಡುನ್ ಆಯಿಲ್ಲಿ ರೀತ್ ವಿವರಾವ್ನ್, ಬಾಯ್ಲಾ-ಹೊಪ್ ತರ್ಬೆತಿ ಕಶಿ ಚಲ್ತಾ ತಾಚಿ ಮಾಹೆತ್ ದೀವ್ನ್, ಸರ್ವಾಂಕ್ ಯೆವ್ಕಾರ್ ಮಾಗ್ಲೊ.

ವೆದಿರ್ ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಪಿಂಟೊ ಹಾಜರ್ ಆಸುಲ್ಲೊ. ಡೆಲಿಶಿಯಾ ಪಿರೇರಾನ್ ಕಾರ್ಯಾಚೆಂ ಸುಂಕಾಣ್ ಸಾಂಬಾಳುನ್, ಸರ್ವಾಂಚೊ ಆಭಾರ್ ಮಾಂದ್ಲೊ.

ಬಾಯ್ಲಾ ಹೊಪ್ ತರ್ಬೆತಿ 40 ವೊರಾಂಚಿ ಆಸುನ್, ಕೊಂಕ್ಣಿ ಬಾಯ್ಲಾ ಆನಿ ಪಾಶ್ಚ್ಯಾತ್ಯ್ ಹಿಪ್ ಹೊಪ್ ಪ್ರಕಾರ್ ಶಿಕಯ್ತಾತ್. ಹೆಳ್ ಲ್ಲೆ ತರ್ಬೆತ್ದಾರ್ ಮಾಸ್ಟರ್ ಕ್ಲಾಸ್ ಘೆತಲೆ. ಹಾಂಗಾ ಶಿಕ್ ಲ್ಲ್ಯಾ ಭುರ್ಗ್ಯಾಂಕ್ ವೆದಿಂನಿ, ಸಂಗೀತ್ ಸಾಂಜೆಂನಿ, ವಿಡಿಯೊ, ಸಿನೆಮಾಂನಿ ಆವ್ಕಾಸಾಚಿಂ ದಾರಾಂ ಉಗಡ್ತಲಿಂ.