News Update

ಮಾಂಡ್ ಸೊಭಾಣಾನ್ ಸಾಹಿತ್ಯಾ ಖಾತಿರ್ ವಾವ್ರುಂಕ್ ಯೆವ್ಜಿಲ್ಲ್ಯಾ ಮಿಟಾಕಣ್ ಹಾಚೆಂ ಉಗ್ತಾವಣ್ 23.02.25 ವೆರ್ ಕಲಾಂಗಣಾಂತ್ ಚಲ್ಲೆಂ. ಭುರ್ಗ್ಯಾಂಚೊ ಸಾಹಿತಿ ಜೆ ಎಫ್ ಡಿಸೋಜ ಅತ್ತಾವರ್ ಹಾಣೆಂ ಚಾಳ್ಳಲ್ಯಾ ತಾಕಾಕ್ ಮೀಟ್ ಘಾಲ್ನ್, ಖಿರೊವ್ನ್ ಉಗ್ತಾಯ್ಲೆಂ ಆನಿ ಆಪ್ಲೊ ಸಂದೇಶ್ ದಿಲೊ.

ಪ್ರಸ್ತಾವಿಕ್ ಉಲೊವ್ಪ್ ದಿಲ್ಲ್ಯಾ ಮಿಟಾಕಣ್ ಸಂಚಾಲಕ್ ರೊನಿ ಕ್ರಾಸ್ತಾನ್ ಮಾಂಡ್ ಸೊಭಾಣಾನ್ 1998 ಇಸ್ವೆಂತ್ ಮಿಟಾಕಣ್ ಸುರ್ವಾತುನ್ ಕವಿಗೋಷ್ಟಿ, ಪುಸ್ತಕ್ ಪರ್ಗಟ್ಣಿ, ಸಾಹಿತಿಕ್ ಆಟೊವ್ ಅಸಲೊ ವಾವ್ರ್ ಕೆಲ್ಲೊ. ಅನಿವಾರ್ಯ್ ಕಾರಣಾಂನಿ ಬಂಧ್ ಪಡ್ಲಲೊ ಮಿಟಾಕಣ್ ಆತಾಂ ಪರತ್ ನವ್ಯಾ ಹುಮೆದಿನ್ ಸುರ್ವಾತ್ತಾ. ಹ್ಯಾ ವರ್ಸಾ ಭುರ್ಗ್ಯಾಂಚ್ಯಾ ಸಾಹಿತ್ಯಾಚೆರ್ ವಾವ್ರ್ ಕರ್ಚಿ ಯೆವ್ಜಣ್ ಆಸಾ. ಹೆರ್ ಭಾಸಾಂತ್ಲ್ಯೊ ಭುರ್ಗ್ಯಾಂಚ್ಯೊ ಕಾಣಿಯೊ ಕೊಂಕ್ಣೆಕ್ ಹಾಡ್ಚ್ಯೊ. ವರ್ಸಾಕ್ ದೋನ್ ವಾ ತೀನ್ ನವ್ಯಾಚ್ ಕವಿತೆಂಚ್ಯೊ ಕವಿಗೋಷ್ಟಿ ಕರ್ಚ್ಯೊ ಆನಿ ನವೆಂಬ್ರಾಂತ್ ಭುರ್ಗ್ಯಾಂಚೊ ಸಾಹಿತ್ಯೋತ್ಸವ್ ಅಚರುಂಚೊ ಮ್ಹಣ್ ಕಳಯ್ಲೊ.

ಭುರ್ಗ್ಯಾಂಚ್ಯಾ ಸಾಹಿತ್ಯಾಚ್ಯಾ ವಾವ್ರಾ ಯೆವ್ಜಣೆಕ್ ಮಾರ್ಗದರ್ಶಿ ಉಲೊವ್ಪ್ ದಿಲ್ಲ್ಯಾ ಭಾಶೆ ಗಿನ್ಯಾನಿ ಮಾ.ದೊ. ಪ್ರತಾಪ್ ನಾಯ್ಕ್ ಜೆ.ಸ. ಹಾಣಿಂ ಭುರ್ಗ್ಯಾಂ ಸವೆಂ ಭುರ್ಗಿಂ ಜಾಯ್ಜೆ, ತಾಂಕಾಂ ಸಮ್ಜುನ್, ಭುರ್ಗ್ಯಾಂಚ್ಯಾ ನದ್ರೆಂತ್ಲ್ಯಾನ್ ತಾಂಚೆಂ ಸಾಹಿತ್ಯ್ ರುತಾ ಜಾಯ್ಜೆ ಮ್ಹಣ್ ಸಾಂಗುನ್ 12 ಮಾರ್ಗದರ್ಶಿ ಸೂತ್ರಾಂನಿ ಆಪ್ಲೆಂ ಉಲೊವ್ಪ್ ಹಾತಾಳ್ಳೆಂ. ಸಾಹಿತ್ಯ್ ಮ್ಹಳ್ಯಾರ್ ಫಕತ್ ಪುಸ್ತಕಾಂನಿ ನ್ಹಯ್. ಆಯ್ಚ್ಯಾ ಕಾಳಾಕ್ ಸರಿ ಜಾವ್ನ್ ಕಾರ್ಟೂನಾಂ, ವಿಡಿಯೊ, ಆಡಿಯೊ ಆನಿ ಹೆರ್ ಸಾಮಾಜಿಕ್ ಮಾಧ್ಯಮಾಂನಿ ಭುರ್ಗ್ಯಾಂಕ್ ಆಂವಡ್ಚೆ ಪರಿಂ ಆಸ್ಚೆಂ ಗರ್ಜೆಚೆಂ ಮ್ಹಣ್ ಸಾಂಗ್ಲೆಂ. ಉಪ್ರಾಂತ್ ಸಂವಾದ್ ಚಲ್ಲೊ. ಎರಿಕ್ ಒಝೇರಿಯೊ, ನವೀನ್ ಕುಲ್ಶೇಕರ್, ಅಜಯ್ ಡಿಸೋಜ, ಹೇಮಾಚಾರ್ಯ, ಲಿಲ್ಲಿ ಮಿರಾಂದ, ಚಾರ್ಲಿ ಕುಲ್ಶೇಕರ್, ಸಲೋಮಿ ಮಿಯಾಪದವ್ ಆನಿ ಮುಂಡ್ರೆಲ್ ಸಿರಿಲ್ ಹಾಣಿಂ ಆಪಾಪ್ಲೆ ವಿಚಾರ್ ವೆಕ್ತ್ ಕೆಲೆ.

ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಪಿಂಟೊನ್ ಸಯ್ರ್ಯಾಂಕ್ ಫುಲಾಂಚೊ ಮಾನ್ ಅರ್ಪಿಲೊ. ಅರುಣ್ ರಾಜ್ ರೊಡ್ರಿಗಸಾನ್ ಕಾರ್ಯೆಂ ಸಾಂಬಾಳ್ನ್ ಸಂವಾದ್ ಚಲಯ್ಲೊ.