ಮಾಂಚಿಯೆಕ್ 23 ವರ್ಸಾಂ ಸಂಪ್ಲಿ; `ಆಯ್ರಿಕ್ ಸಯ್ರಿಕ್' ಜಾಲಿ.
ಮಾಂಡ್ ಸೊಭಾಣ್ ಸ್ಥಾಪನ್ ಜಾವ್ನ್ 39 ವೆಂ ವರಸ್ ಸುರು ಜಾಲೆಂ. ಮ್ಹಯ್ನ್ಯಾಳಿ ಮಾಂಚಿ ಶಿಂಕ್ಳೆಚಿಂ 23 ವರ್ಸಾಂ ಸಂಪ್ಲಿಂ. ಮಾಂಡ್ ಸೊಭಾಣಾನ್ ಆಪ್ಲ್ಯಾ ವಾವ್ರಾಕ್ ದುಡ್ವಾ ಧಿಗೊ ಜೊಡುನ್ ಘೆಂವ್ಕ್ ಧಿಗೊ ಅಭಿಯಾನ್ ಘೋಷಣ್ ಕೆಲೆಂ. ಆನಿ 276 ವಿ ಮಾಂಚಿ ಜಾವ್ನ್ ಕಲಾಕುಲ್ ಪಂಗ್ಡಾನ್ `ಆಯ್ರಿಕ್ ಸಯ್ರಿಕ್' ನಾಟಕ್ ಸಾದರ್ ಕೆಲೊ.
01 ದಶೆಂಬ್ರ್ 2024 ವೆರ್ ಕಲಾಂಗಣಾಂತ್ ಸಾಲ್ ಭರ್ ಜಮ್ ಲ್ಲ್ಯಾ ಲೊಕಾ ಹುಜಿರ್ ಮಂಗ್ಳುರ್ಚೊ ನಾಂವಾಡ್ದಿಕ್ ಚಾರ್ಟರ್ಡ್ ಎಕೌಂಟೆಂಟ್ ಆನಿ ಆದ್ಲ್ಯಾ ತೆಂಕೊ ಅಭಿಯಾನಾಚೊ ಜಿಕ್ಪಿ ಒಲ್ವಿನ್ ರೊಡ್ರಿಗಸ್ ಹಾಣೆಂ ಧಿಗೊ ಅಭಿಯಾನಾಚಿಂ ಹಾತ್ ಪತ್ರಾಂ ಆನಿ ಕುಪನಾಂ ಲೊಕಾರ್ಪಣ್ ಕರುನ್ ಚಲಾವಣ್ ದಿಲೆಂ. `` ಮಾಂಡ್ ಸೊಭಾಣ್ ಕೊಂಕ್ಣೆಂತ್ ನಿರಂತರ್ ವಾವ್ರ್ ಕರುನ್ ಆಸ್ಚೊ ಏಕ್ ಸಂಸ್ಥೊ. ತಾಂಚೊ ವಾವ್ರ್ ಹಾಂವ್ ವಳ್ಕುನ್ ಜಾಣಾ. ತಾಂಚ್ಯಾ ಕಾರ್ಬಾರಾಂನಿ ಕೊಂಕ್ಣೆಕ್ ಉಂಚಾಯ್ ದಿಲ್ಯಾ. ತೆ ಕೊಂಕ್ಣೆ ಖಾತಿರ್ ಮಸ್ತ್ ಸಾಕ್ರಿಫಿಸ್ ಕರ್ತಾತ್. ತಾಂಕಾಂ ಆಮಿಯ್ ಸಾಕ್ರಿಫಿಸ್ ಕರ್ನ್ ಸಹಕಾರ್ ದೀಜೆ'' ಮ್ಹಣ್ ತಾಣೆಂ ಉಲೊ ದಿಲೊ.
.jpg)
.jpg)
.jpg)
ತೀನ್ ವರ್ಸಾಂ ಉಪ್ರಾಂತ್ ಆಪ್ಲ್ಯಾ ಕೊಂಕ್ಣಿ ವಾವ್ರಾಕ್ ದುಡು ಜಮೊಂವ್ಕ್ ಧಿಗೊ ಅಭಿಯಾನ್ ಸುರು ಕೆಲಾಂ. ಪಾಂಚ್ ಹಜಾರ್ ರುಪ್ಯಾಂಚ್ಯಾ ಕುಪನಾಚೆರ್ ಕಾಲ್ದೊ ಕಿಲೊ ಭಾಂಗಾರ್ ಜಿಕ್ಚೊ ಆವ್ಕಾಸ್ ಆಸುನ್, ಕಿತ್ಲಿಂ ಚಡ್ ಕುಪನಾಂ ತಿತ್ಲೊ ಚಡ್ ಮಾಂಡ್ ಸೊಭಾಣಾಕ್ ಧಿಗೊ ಲಾಭ್ತಲೊ ಆನಿ ತುಮ್ಕಾಂ ಜಿಕ್ಚೊ ಆವ್ಕಾಸ್ ಚಡ್ತಲೊ. ಪಾಸ್ಕಾಂಚ್ಯಾ ಆಯ್ತಾರಾ 20.04.2025 ವೆರ್ ಡ್ರೊ ಚಲ್ತಲೊ.
ಹೆಚ್ ವೆಳಿಂ ಸುಮೇಳಾನ್ ಗಾಯ್ಲಲ್ಯಾ ನತಲಾಂ ಗಿತಾಂಚೊ ವಿಡಿಯೊ ಮೆಕ್ಳಿಕ್ ಕೆಲೊ. ಹೊ ವಿಡಿಯೊ ವಿಕಾಸ್ ಲಸ್ರಾದೊನ್ ನಿರ್ದೇಶನ್ ಕೆಲ್ಲೊ ಆಸುನ್ ಮಾಂಡ್ ಸೊಭಾಣ್ ಯೂಟ್ಯೂಬಾರ್ ಪಳೆಂವ್ಕ್ ಮೆಳ್ತಲೊ.
ಉಪ್ರಾಂತ್ ಪ್ರಸಾರ್ ಭಾರತಿಚೊ ನಿವೃತ್ತ್ ಎ.ಡಿ.ಜಿ. ಸಾತುರ್ನಿನ್ ಮತಾಯಸ್ ಹಾಣೆಂ ಘಾಂಟ್ ಮಾರುನ್ ಮಾಂಚಿಯೆಕ್ ಚಲಾವಣ್ ದಿಲೆಂ. ವೆದಿರ್ ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊ, ಕಾರ್ಯದರ್ಶಿ ಕೇರನ್ ಮಾಡ್ತಾ ಆನಿ ಖಜಾನಿ ಎಲ್ರೊನ್ ರೊಡ್ರಿಗಸ್, ಸಾಂದೊ ಅಜಯ್ ಡಿಸೋಜ ಹಾಜರ್ ಆಸ್ಲಲೆ. ಅರುಣ್ ರಾಜ್ ರೊಡ್ರಿಗಸಾನ್ ಕಾರ್ಯೆಂ ಸಾಂಬಾಳ್ಳೆಂ.
ಉಪ್ರಾಂತ್ ದೆ. ಲ್ಯಾನ್ಸಿ ಪಿಂಟೊ ನಾಯಕಾನ್ ಬರೊವ್ನ್, ಮನಿಷ್ ಪಿಂಟೊ ಎನ್ ಎಸ್ ಡಿ ಹಾಣೆಂ ದಿಗ್ದರ್ಶಿಲ್ಲೊ ನಾಟಕ್ `ಆಯ್ರಿಕ್ ಸಯ್ರಿಕ್' ಕಲಾಕುಲ್ 2024-25 ಆವ್ದೆಚ್ಯಾ ವಿದ್ಯಾರ್ಥಿಂನಿ ಖೆಳೊವ್ನ್ ದಾಕಯ್ಲೊ.
