News Update

ಆಜ್ ಆಯ್ತಾರ್, ನವೆಂಬ್ರ್ 17 ವೆರ್, ದೀಸ್‌ಭರ್, ಕಲಾಂಗಣಾಂತ್ ಆಭ್ಯಾಸಾಂಚೊ ವ್ಹೊರ್ ಆಯ್ಲೊ.

ಸಕಾಳಿಂಚ್ಯಾ ಆದೇಸಾರ್ ಕಲಾಕುಲ್ ಕಲಾಕಾರಾಂನಿ ನಾಟಕ್ ಅಭ್ಯಾಸ್ ಚಲಯ್ಲೊ. ಎನ್ ಎಸ್ ಡಿ ಪದ್ವೆದಾರ್ ಮನೀಷ್ ಪಿಂಟೊನ್ ನಾಟಕ್ ಅಭ್ಯಾಸ್ ಕರಯ್ಲೊ. ಹೊ ನಾಟಕ್ ದಶೆಂಬ್ರ್ 01 ವೆರ್ ಕಲಾಂಗಣಾಂತ್ 276 ವೆಂ ಮ್ಹಯ್ನ್ಯಾಳ್ಯೆ ಮಾಂಚಿಯೆರ್ ಸಾದರ್ ಜಾತಲೊ.

ದೊನ್ಪರಾಂ ಉಪ್ರಾಂತ್ ಗಾಯಾನಾಚೊ ಅಭ್ಯಾಸ್‌ಚ್ ಅಭ್ಯಾಸ್. ಎಕಾ ಕುಶಿನ್ ಸುರ್ ಸೊಭಾಣ್ ಭುರ್ಗಿಂ ಶಿಲ್ಪಾಬಾಯೆಚ್ಯಾ ಸುರ್ ಆಲಾಪಾಕ್ ತಕ್ಲಿ ಹಾಲಯಿತ್ ಹಿಂದೂಸ್ತಾನಿ ಗಾಯಾನ್ ಆನಿ ಕೊಂಕ್ಣಿ ಪದಾಂ ಶಿಕ್ಲಿಂ. ಡಿಯೆಲ್ ಬಾಯೆನ್ ಹ್ಯೆ ಶಿಕೊವ್ಣೆಕ್ ತೆಂಕೊ ದಿಲೊ.

ತ್ಯಾಚ್ ವೆಳಾರ್ ಹ್ಯಾ ಭುರ್ಗ್ಯಾಂಕ್ ಪಾಂವ್ಕ್ ಆಯಿಲ್ಲ್ಯಾ ವ್ಹಡಿಲಾಂಕ್ ಕಾಂಯ್ ಇಲ್ಲೆಂ ರುಕಾ ಮುಳಾಂತ್ಲೆಂ ಗಿನ್ಯಾನ್ ವಾಂಟ್ಚೆ ಖಾತಿರ್ ಆದ್ಲ್ಯಾ ಹಫ್ತ್ಯಾಂತ್ ಸುರು ಕೆಲ್ಲೊ ಆಟೊವ್ ಹ್ಯಾ ಹಫ್ತ್ಯಾಂತ್ ಅರುಣ್ ರಾಜಾನ್ ಉಗ್ತ್ಯಾ ವೆದಿರ್ ಖೆಳಾ ಮಾರಿಫಾತ್ ಸುರ್ವಾತ್ಲೊ ತರ್, ಮಾಗಿರ್ ಸಾಲಾಂತ್ ಎರಿಕ್ ಬಾಬಾನ್ ಗಾಯಾನಾ ಮುಖಾಂತ್ರ್ ಮುಕಾರಿಲೊ. ಹ್ಯಾ ಆಟೊವಾಚೊ ಆಟೊವ್ಪಿ ಅಜಯ್ ಡಿಸೋಜ ತಾಕೊಡೆ ಹೆಣೆಂ ತೆಣೆಂ ಧಾಂವ್ತಾಲೊ, ಫೊಟೊ ಕಾಡ್ತಾಲೊ.

ಸುಮೆಳಾಚಿ ಮ್ಹಯ್ನ್ಯಾವಾರ್ ತರ್ಭೆತಿಯ್ ಆಜ್ ಆಸ್‌ಲ್ಲಿ. ನತಾಲಾಂ ಕಾಳಾಕ್ ಸಹಜ್‌ಲ್ಲಿಂ ಗಿತಾಂ ಶಿಕೊವ್ನ್ ರೈನಾ ಬಾಯೆನ್ ತರ್ಭೆತಿ ಸಾಂಬಾಳ್ಳಿ ತರ್, ಸಿಮೋನ್ ಆನಿ ಆಶ್ವಿಲಾನ್ ವ್ಹಾಜಾಂತ್ರಾಂನಿ ಸಾಂಗಾತ್ ದಿಲೊ.

ಭುರ್ಗ್ಯಾಂಕ್ ಪ್ರೇರಣ್ ಕ್ರಾಸ್ತಾಚ್ಯಾ ಜಲ್ಮಾ ದಿಸಾ ಲೆಕಾರ್ ಗೊಡ್ಶೆಂ 'ಸಾಟ್' ತರ್, ವ್ಹಡಾಂಕ್ ಎಲ್ರೊನಾ ಲೆಕಾರ್ ಪಪ್ಸ್ ಆನಿ ಜ್ಯೂಸ್ ಆಸ್‌ಲ್ಲೆ.
ಸಂದೀಪ್ ಆನಿ ರೋನನ್ ಆತ್ತಾಂ ಹಾಂಗಾ, ಆತ್ತಾಂ ಥಂಯ್, ಆತ್ತಾಂ ಮೈಕ್, ಆತ್ತಾಂ ಬೈಕ್, ವೋತ್ ಜ್ಯೂಸ್, ದೀ ಪಪ್ಸ್ ಮ್ಹಣ್ ಕಂಡಾಪಟ್ಟೆ ಬಿಜಿ ಉರ್ಲೆ.

ಲಗ್ಬಗ್ 110 ಜಣಾಂನಿ ಗಿತಾಂ ಆನಿ ನಾಟಕಾ ಸವೆಂ ಕೊಂಕ್ಣೆಚಿ ವ್ಹಡ್ವಿಕಾಯ್ ಗಾಯ್ಲಿ. ಜಾಣ್ವಾಯ್ ಜೊಡ್ಲಿ.

ಅಖೇರ್ ಜಾತಾನಾ ಪಾವ್ಸ್'ಯಿ ಆಯಿಲ್ಲೊ ಆನಿ ಥಕ್‌ಲ್ಲ್ಯಾ ಕುಡಿಂಕ್ ಆನಿ ಸುಶೆಗ್ ಜೊಡ್‌ಲ್ಲ್ಯಾ ಮನಾಂಕ್ ಥಂಡಾಯ್ ದಿವುನ್ ಗೆಲೊ.