News Update

ಭಾಯ್ರ್ ಶಿರಾಂಧಾರಿಂಚ್ಯಾ ಪಾವ್ಸಾಚಿ ಆನಿ ಕಲಾಂಗಣಾಚ್ಯಾ ಸಾಲಾ ಭಿತರ್ ಸಂಗೀತ್ ಗಾಯಾನಾಚ್ಯಾ ಮಧುರ್ ನಾದಾಚಿ ಜುಗಲ್ ಬಂಧಿ ಚಲ್ತಾನಾ, ಮಳ್ಬಾರ್ ಘಡ್ಗಡ್ಯಾ ಝಗ್ಲಾಣ್ಯಾನ್ ತಾಳ್ ಧರ್ಲೊ. ಆನಿ ಸುಮೇಳಾಚ್ಯಾ ಸಂಗೀತ್ ಸಾಂಜೆಕ್ ನವೊಚ್ ರಂಗ್ ಭರ್ಲೊ. 06.10.24 ವೆರ್ ಅಂತರ್ ರಾಷ್ಟ್ರೀಯ್ ಸಂಗೀತ್ ದಿವಸ್ ಸಂಗೀತ್ ಸಂಧಿ ನಾಂವಾರ್ ನೆಟಾನ್ ನೆಟಯ್ಲೊ.

ಕೊಂಕ್ಣಿ, ತುಳು, ಇಂಗ್ಲೀಶ್, ಹಿಂದಿ, ಮಲಯಾಳಮ್, ಮಣಿಪುರಿ, ಸಿಂಹಳೀ, ಸ್ಪಾನಿಶ್ ಹ್ಯಾ ಆಟ್ ಭಾಸಾಂನಿ, ಚವೆಚಾಳಿಸ್ ಗಾವ್ಪಿ ಗಾವ್ಪಿಣ್ಯಾಂನಿ ಅಪುರ್ಬಾಯೆಚಿಂ ಪದಾಂ ಗಾವ್ನ್ ಹಾಜರ್ ಆಸ್ಲ್ಯಲ್ಯಾಂಚಿಂ ಕಾಳ್ಜಾ ಕಂತ್ರೆಲಾಂ ಧಲಯ್ಲಿಂ. ರೋಶನ್ ಬೇಳಾ, ಸಂಜಯ್ ರೊಡ್ರಿಗಸ್, ಸಂಜೀತ್ ರೊಡ್ರಿಗಸ್ ಆನಿ ಸ್ಟಾಲಿನ್ ಡಿಸೋಜಾನ್, ಸಂಗೀತ್ ಸುರಾಂಚಿ ನಾಡ್ ಧರ್ನ್, ಆಪಾಪ್ಲ್ಯಾ ಸಂಗೀತ್ ವ್ಹಾಜಾಂತ್ರಾಂಚೆರ್ ಬೊಟಾಂ ಚಲಾಕಿ ದಾಕೊವ್ನ್, ಆತ್ಮ್ಯಾ ಜನೆಲಾಂ ಫುಲಯ್ಲಿಂ.

ಸಂಗೀತ್ಗಾರ್ ರೋಶನ್ ಬೇಳಾನ್ ಘಾಂಟ್ ವ್ಹಾಜೊವ್ನ್ ಮಾಂಡ್ ಸೊಭಾಣಾಚ್ಯಾ 274 ವ್ಯೆ ಮಾಂಚಿಯೆಕ್ ಚಲಾವಣ್ ದಿಲೆಂ. ಕಾರ್ಯಾಮಧೆಂ ಅಂತರ್ ರಾಷ್ಟ್ರೀಯ್ ಸಂಗೀತ್ ದಿವಸ್ ಕಾರ್ಯಾವಳಿಂತ್ ಪಾಳುನ್ ಆಯಿಲ್ಲ್ಯಾ ಸಂಪ್ರದಾಯಾ ಪರ್ಮಾಣೆಂ ವಯೊಲಿನ್ ವ್ಹಾಜೊವ್ಪಿ ಆನಿ ಶಿಕೊವ್ಪಿ ನಿರಂಜನ್ ಸುನಿಲ್ ಕುಮಾರ್ ಹಾಕಾ ಸಂಗೀತ್ ಸನ್ಮಾನ್ ಕೆಲೊ. ಸುಮೇಳ್ ಸಮನ್ವಯಿ ರೈನಾ ಸಿಕ್ವೇರಾ ಹಿಣೆಂ ಸುಡ್ಸುಡಿತ್ ಉತ್ರಾಂಚೊ ಯೆವ್ಕಾರ್ ಮಾಗ್ಲೊ. ಮಾಂಡ್ ಸೊಭಾಣ್ ಖಜಾನಿ ಎಲ್ರೊನ್ ರೊಡ್ರಿಗಸಾನ್ ಮಾನ್ ಪತ್ರ್ ವಾಚ್ಲೆಂ ತರ್, ವೆದಿರ್ ಆಸ್ಲಲ್ಯಾ ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊ, ಅಧ್ಯಕ್ಷ್ ಲುವಿ ಪಿಂಟೊ ಆನಿ ಸುಮೇಳ್ ಖಜಾಂಚಿ ಕ್ಲಾರಾ ಪಿಂಟೊ ಹಾಣಿಂ ಶ್ಹೆಲೊ, ಝೆಲೊ, ಫಳ್ ವಸ್ತು, ಯಾದಿಸ್ತಿಕಾ ಆನಿ ಮಾನ್ ಪತ್ರ್ ದೀವ್ನ್ ಸನ್ಮಾನ್ ಭೆಟಯ್ಲೊ. ಫುಮಾರ್ ಕಾಳ್ಜಾ ಸವೆಂ ಸುನಿಲಣ್ಣಾನ್ ಆಪ್ಲಿಂ ಭೊಗ್ಣಾಂ ಉಚಾರ್ನ್ ಸರ್ವಾಂಚೊ ಆಭಾರ್ ಮಾಂದ್ಲೊ.

ಅನಿಲ್ ಡಿಕುನ್ಹಾ, ಅಜಯ್ ಡಿಸೋಜ ತಾಕೊಡೆ, ಡೊ ಝೀನಾ ಮೆಂಡೊನ್ಸಾ, ವಿಸ್ಮಯಾ ಲೋಬೊ ಹಾಣಿಂ ಸರಳ್ ಆನಿ ಸುರಸ್ ಶೈಲೆನ್ ಸಂಗೀತ್ ಕಾರ್ಯಾಚೆಂ ಸೂತ್ರ್ ಸಂಚಾಲನ್ ಕೆಲೆಂ ತರ್, ಲವಿನಾ ದಾಂತಿ ಹಿಣೆಂ ಸನ್ಮಾನ್ ಕಾರ್ಯೆಂ ಸಾಂಬಾಳ್ಳೆಂ. ಐರಿನ್ ರೆಬೆಲ್ಲೊನ್ ಕಳೊವ್ಣ್ಯೊ ದಿಲ್ಯೊ.

.......................

ಸುಮೇಳ್ 2015 ಇಸ್ವೆಂತ್ ಸ್ಥಾಪ್ಲಲೊ ಮಾಂಡ್ ಸೊಭಾಣಾಚೊ ಗಾಯಾನ್ ಪಂಗಡ್ ಆಸುನ್ ಚ್ಯಾರ್ ತಾಳ್ಯಾಂನಿ ಗಾಂವ್ಚಿ ತರ್ಭೆತಿ ಘೆವ್ನ್, ವೆದಿಂನಿ ತಶೆಂ ಸೊಭಾಣಾಂನಿ ಕಾರ್ಯಿಂ ಸುಂರ್ಗಾರಾಯ್ತಾತ್. ಪ್ರಸ್ತುತ್ ಬೈಂದೂರ್ ಥಾವ್ನ್ ಕಾರ್ಕಳ್ ಆನಿ ಬಂಟ್ವಾಳ್ ಪರ್ಯಾಂತ್ ಆಸಕ್ತ್ ವಂತ್ ಲಗ್ಬಗ್ 60 ಸಂಗೀತ್ ಮೊಗಿ ಮ್ಹಯ್ನ್ಯಾಚ್ಯಾ ತಿಸ್ರ್ಯಾ ಆಯ್ತಾರಾ ತರ್ಭೆತಿ ಜೊಡ್ತಾತ್.