ಸಂಗೀತ್ ಶೆತಾಂತ್ ಥೊರಾಯೆನ್ ಆಪ್ಲಿಂ ಪಾವ್ಲಾಂ ಥಿರಾಯಿಲ್ಲ್ಯಾ ರೊಲ್ಫ್ ರೋಶನ್ ಕ್ರಾಸ್ತಾ ಹಾಕಾ ಕಾರ್ವಾಲ್ ಘರಾಣೆಂ ಆನಿ ಮಾಂಡ್ ಸೊಭಾಣಾನ್ ಜೋಡ್ ಮೆಳಿನ್ ದಿಂವ್ಚೊ 2024 ವ್ಯಾ ವರ್ಸಾಚೊ ಕಲಾಕಾರ್ ಪುರಸ್ಕಾರ್ ಫಾವೊ ಜಾಲಾ.
ಮುಳಾನ್ ಬೇಳಾಚೊ ಆಸುನ್ ಪ್ರಸ್ತುತ್ ಕೆಲರಾಂಯ್ತ್ ವಸ್ತಿ ಆಸ್ಚ್ಯಾ ರೋಶನಾನ್ ಮುಳಾವೆಂ ಶಿಕಪ್ ಬೇಳಾಂತ್ ಸಂಪೊವ್ನ್, ಸಾಂ ಲುವಿಸ್ ಕೊಲೆಜಿ ಥಾವ್ನ್ ಪದ್ವಿ ಆಪ್ಣಾಯ್ಲಿ. ಲ್ಹಾನ್ ಪ್ರಾಯೆ ಥಾವ್ನ್ ಸಂಗೀತಾಚಿ ವೋಡ್ ಆಸುಲ್ಲ್ಯಾ ತಾಣೆಂ ಸ್ವ ಖುಶೆನ್ ಗಿಟಾರ್ ಹಾತಾಂತ್ ಧರ್ಲೆಂ. ವೊರಾಂಚಿಂ ವೊರಾಂ, ವರ್ಸಾಂಚಿಂ ವರ್ಸಾಂ ಘಾಲ್ಲ್ಯೆ ಮ್ಹಿನತೆಚೊ ಫಳ್ ಜಾವ್ನ್ ಗಿತಾರಾಚ್ಯಾ ಸರಿಯಾಂ ಥಾವ್ನ್ ಕಾಳ್ಜಾ ಮನಾಂಕ್ ಆಂವಡ್ಚೆಂ ಸಂಗೀತ್ ವ್ಹಾಳೊಂವ್ಚೆಂ ಜಾದೂ ತಾಚ್ಯಾ ಬೊಟಾಂಕ್ ಮೆಳ್ಳಾಂ.
.jpg)
.jpg)
ಮಂಗ್ಳುರ್ ಆನಿ ಭಾಯ್ಲ್ಯಾ ಜಾಯ್ತ್ಯಾ ಸಂಗೀತ್ ಪಂಗ್ಡಾಂಚೊ ತೊ ಜಿವಾಳ್ ವಾಂಟೊ. ಜಾಯ್ತ್ಯಾ ಸಂಗೀತ್ ಸಾಂಜೆಂಕ್ ತಾಣೆಂ ಜೀವ್ ಭರ್ಲಾ. ಹೆನ್ರಿ ಡಿಸೋಜ, ಲೊರ್ನಾ, ವಿಕ್ಟರ್ ಕೊನ್ಸೆಸೊ, ಮೆಲ್ವಿನ್ ಪೆರಿಸ್, ಮಿಕ್ ಮ್ಯಾಕ್ಸ್, ರೋಶನ್ ಬೆಳ್ಮಣ್, ಲೊಯ್ಡ್ ರೇಗೊ, ಪ್ರಜೋತ್ ಡೆಸಾ ಆನಿ ಹೆರಾಂಚ್ಯಾ ಸಂಗೀತ್ ಸಾಂಜೆಂನಿ ಸಂಗೀತ್ ಖೆಳ್ಳಾ.
ಸೋದ್ – 5 ಗಾಯಾನ್ ರಿಯಾಲಿಟಿ ಶೋ ಹಾಚೊ ಸಂಗೀತ್ ನಿರ್ದೇಶಕ್ ಜಾವ್ನ್ ತಾಚೆಂ ಕಾಮ್ ಹೊಗ್ಳಿಕೆಕ್ ಫಾವೊ ಜಾಲಾಂ. ಸಬಾರ್ ಕೊವ್ಳೆಂಕ್, ಪದಾಂಕ್ ತಾಣೆಂ ಸಂಗೀತ್ ರಚ್ಲಾಂ. ಥೊಡಿಂ ಪದಾಂ ಘಡುನ್ ತಾಳೆ ಬಸಯ್ಲ್ಯಾತ್.
ಕೊಂಕ್ಣಿ ಸಂಗೀತಾಕ್ ಶ್ರೇಷ್ಟತಾಯ್ ದೀಂವ್ಕ್ ಘಾಲ್ಚಿ ತಾಚಿ ಮ್ಹಿನತ್, ಉಂಚಾಯ್ ಜೊಡುನ್ ದೀಂವ್ಕ್ ವಾಪರ್ಚೊ ವೇಳ್ ಆನಿ ತಾಚಿ ಸಕತ್, ನವ್ಯಾಂಕ್ ಶಿಕೊಂವ್ಚಿ ತಾಚಿ ಹುಮೆದ್ ಹೆಂ ಸರ್ವ್ ವರೊವ್ನ್ ಪಳೆವ್ನ್ ಸಮಿತಿನ್ ತಾಕಾ ಹ್ಯಾ ಪುರಸ್ಕಾರಾಕ್ ವಿಂಚ್ಲಾ.
2024 ನವೆಂಬ್ರ್ 03 ವೆರ್ ಆಯ್ತಾರಾ ಸಾಂಜೆರ್ 6.00 ವೊರಾರ್ ಕಲಾಂಗಣಾಂತ್ ಚಲ್ಚ್ಯೆ, 275 ವ್ಯೆ ಮ್ಹಯ್ನ್ಯಾಳ್ಯೆ ಮಾಂಚಿಯೆರ್ ಪರ್ಗಟ್ ಮಾನ್ ಕರ್ನ್, ರು. 50,000/- ಐವಜ್, ಮಾನ್ ಪತ್ರ್ ಯಾದಿಸ್ತಿಕಾ ಆಟಾಪ್ಚೊ 20 ವೊ ಕಲಾಕಾರ್ ಪುರಸ್ಕಾರ್ ಹಾತಾಂತರ್ ಕರ್ತಲೆ. ಮುಂಬಯಾಂತ್ ಬ್ಯಾಂಕಿಂಗ್ ಶೆತಾಂತ್ ನಾಂವಾಡ್ಲಲೊ ಜೊನ್ ಡಿಸಿಲ್ವಾ ಕಾರ್ಕಳ್ ಮುಕೆಲ್ ಸಯ್ರೊ ಆನಿ ಮಸ್ಕತಾಂತ್ಲೊ ಉದ್ಯಮಿ ಸ್ಟ್ಯಾನ್ಲಿ ಫೆರ್ನಾಂಡಿಸ್ ಮಾನಾಚೊ ಸಯ್ರೊ ಜಾವ್ನ್ ಹಾಜರ್ ಆಸ್ತಲೆ. ಉಪ್ರಾಂತ್ ಗೊಂಯ್ಚ್ಯಾ ಪಿಯೊ ಆಗ್ನೆಲೊ ಆನಿ ಪಂಗ್ಡಾ ಥಾವ್ನ್ `ಗೊಂಯ್ಚೆಂ ದಾಯ್ಜ್' ಸಂಗೀತ್ ಸಾಂಜ್ ಸಾದರ್ ಜಾತಲಿ.
ಕೊಂಕ್ಣಿ ಸಾದರ್ ಕಲೆಚ್ಯಾ ಕಲಾಕಾರಾಂಕ್ ಮಾನ್ ಕರುಂಕ್ 2005 ಇಸ್ವೆಂತ್ ಗೊಂಯ್ಚೊ ಭಾಶೆ ಗಿನ್ಯಾನಿ ಬಾಪ್ ಪ್ರತಾಪ್ ನಾಯ್ಕ್ ಹಾಣೆಂ `ಕಾರ್ವಾಲ್ ಘರಾಣೆಂ' ಕುಟ್ಮಾಚ್ಯಾ ನಾಂವಾರ್ ಆನಿ ಮಾಂಡ್ ಸೊಭಾಣ್ ಸಂಸ್ಥ್ಯಾಚ್ಯಾ ಆಸ್ರ್ಯಾಖಾಲ್ ಹೊ ಪುರಸ್ಕಾರ್ ಸ್ಥಾಪಿತ್ ಕೆಲ್ಲೊ. ಎದೊಳ್ಚ್ಯಾಕ್ ಅರುಣ್‍ರಾಜ್ ರೊಡ್ರಿಗಸ್ (ನಾಟಕ್), ಜೊಯೆಲ್ ಪಿರೇರಾ (ಸಂಗೀತ್), ಹ್ಯಾರಿ ಡಿಸೊಜಾ (ಬ್ರಾಸ್ ಬ್ಯಾಂಡ್), ಮಾ. ಬಾ. ಚಾರ್ಲ್ಸ್ ವಾಸ್ (ಭಕ್ತಿ ಸಂಗೀತ್), ಅನುರಾಧಾ ಧಾರೇಶ್ವರ್ (ಸಂಗೀತ್), ಸಂತ ಭದ್ರಗಿರಿ ಅಚ್ಯುತದಾಸ್, ಬೆಂಗ್ಳುರ್ (ಹರಿಕಥಾ), ಜೇಮ್ಸ್ ಲೊಪಿಸ್, ಹೊನ್ನಾವರ್ (ಬ್ರಾಸ್ ಬ್ಯಾಂಡ್), ನೊರ್ಬರ್ಟ್ ಗೊನ್ಸಾಲ್ವಿಸ್ (ವ್ಹಾಜಾಂತ್ರಿ), ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ (ನಾಟಕ್), ರೋಶನ್ ಡಿಸೋಜ (ಸಂಗೀತ್), ಕ್ರಿಸ್ಟೋಫರ್ ಡಿಸೋಜ (ನಾಟಕ್), ಆವಿಲ್ ಡಿಕ್ರೂಜ್ (ನಾಚ್) ಎಂ. ಗೋಪಾಲ ಗೌಡ (ಲೋಕ್‍ವೆದ್), ಡೊಲ್ಲಾ ಮಂಗ್ಳುರ್ (ನಾಟಕ್), ಐರಿನ್ ರೆಬೆಲ್ಲೊ (ವೊವಿಯೊ-ವೇರ್ಸ್), ಅನಿತಾ ಡಿಸೋಜ (ಗಾಯಾನ್), ನಿಹಾಲ್ ತಾವ್ರೊ (ಗಾಯಾನ್), ಮೆಲ್ವಿನ್ ಪೆರಿಸ್ (ಸಂಗೀತ್), ಆಪೊಲಿನಾರಿಸ್ ಡಿಸೋಜ (ಗಾಯಾನ್) ಹಾಂಕಾಂ ಹೊ ಪುರಸ್ಕಾರ್ ಫಾವೊ ಜಾಲಾ.
