ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಇಕ್ರಾವೊ ಅಧ್ಯಕ್ಷ್ ಜಾವ್ನ್ ಕರ್ನಾಟಕ ಸರ್ಕಾರಾನ್ ನೇಮಕ್ ಕೆಲ್ಲ್ಯಾ ಜೊಕಿಮ್ ಸ್ಟ್ಯಾನಿ ಆಲ್ವಾರಿಸ್ ಹಾಕಾ ಮಾಂಡ್ ಸೊಭಾಣಾ ಥಾವ್ನ್ ಮಾನ್ ಕರ್ಚೆಂ ಕಾರ್ಯೆಂ ಜುಲಾಯ್ 07 ವೆರ್ ಕಲಾಂಗಣಾಂತ್ ಚಲ್ಲೆಂ.
ತಾಕಾ ಶ್ಹೆಲೊ, ಝೆಲೊ, ಉರ್ಮಾಲ್ ಆನಿ ಫಳ್ ವಸ್ತು ದೀವ್ನ್ ಮಾನ್ ಭೆಟಯ್ಲೊ. ತಾಕಾ ಉಲ್ಲಾಸಿಲ್ಲ್ಯಾ ಮಂಗ್ಳುರ್ ದಿಯೆಸೆಜಿಚೊ ಪಿ ಆರ್ ಒ ಆನಿ ಅಕಾಡೆಮಿಚೊ ಪುರ್ವಿಲೊ ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊ ಹಾಣಿಂ ``ಕೊಂಕ್ಣೆ ಖಾತಿರ್ ನಿಸ್ವಾರ್ಥಿ ಸೆವಾ ದಿಲ್ಲ್ಯಾಕ್ ಹೊ ಮಾನ್ ಫಾವೊ ಜಾಲಾ. ಅಕಾಡೆಮಿನ್ ಕೊಂಕ್ಣೆಚ್ಯಾ ಉದರ್ಗತೆಕ್ ಜಾಯ್ತಿಂ ಕಾಮಾಂ ಕರುಂಕ್ ಜಾತಾತ್. ತುಜ್ಯಾ ಆವ್ದೆಂತ್ ಕೊಂಕ್ಣಿ ಭಾಸ್ - ಸಾಹಿತ್ಯ್, ಸಂಸ್ಕೃತಿ ಆನಿ ಶಿಕ್ಷಣ್ ಹ್ಯಾ ಶೆತಾಂನಿ ಮೊಟೊ ವಾವ್ರ್ ಜಾಂವ್ಕ್ ಆಶೆತಾಂ'' ಮ್ಹಣ್ ಬರೆಂ ಮಾಗ್ಲೆಂ.
ಸನ್ಮಾನ್ ಸ್ವೀಕಾರ್ ಕರ್ನ್ ಸಿಂತಿಮೆಂತಾಳ್ ಜಾವ್ನ್ ಉಲಯಿಲ್ಲ್ಯಾ ಸ್ಟ್ಯಾನಿನ್ ``ಆಜ್ ಘರ್ಚೊ ಸನ್ಮಾನ್ ಫಾವೊ ಜಾತಾನಾ ಕಾಳಿಜ್ ಭರುನ್ ಯೆತಾ. ಕೊಂಕ್ಣಿ ಅಕಾಡೆಮಿ ಸುರು ಕರುಂಕ್ ಹಾಂವ್ ಯಿ ವಾವುರ್ಲಾಂ. ಅಕಾಡೆಮಿ ಲೊಕಾಚಿ. ಆಮಿ ಲೊಕಾಕ್ ಸಾಂಗಾತಾ ಘೆವ್ನ್ ವಾವ್ರುಂಕ್ ಆಸಾ. ಆಮ್ಚ್ಯಾ ಕಾರ್ಯಾ ಯೆವ್ಜಣೆ ಪರ್ಮಾಣೆಂ ಹ್ಯಾ ಮ್ಹಯ್ನ್ಯಾಂತ್ ಕೊಂಕ್ಣಿ ಲೇಖಕಾಂಚೆಂ ಸಹಮಿಲನ್ ಆನಿ ಫುಡ್ಲ್ಯಾ ಮ್ಹಯ್ನ್ಯಾಂತ್ ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣ್ ಕರ್ತಾಂವ್. ಯೆಯಾ, ಸಲಹಾ ಸುಚನಾಂ ದಿಯಾ ಸಾಂಗಾತಾ ವಾವುರ್ಯಾಂ'' ಮ್ಹಣ್ ಉಲೊ ದಿಲೊ.
.jpg)
ಹ್ಯೆಚ್ ವೆಳಿಂ ಮಾಂಡ್ ಸೊಭಾಣಾಂತ್ ವಾವುರ್ನ್ ಅಕಾಡೆಮಿ ಸಾಂದೆ ಜಾಲ್ಲ್ಯಾ ರೊನಾಲ್ಡ್ ಕ್ರಾಸ್ತಾ, ನವೀನ್ ಲೋಬೊ ಆನಿ ಸಪ್ನಾ ಸಲ್ಡಾನ್ಹಾ ಹಾಂಕಾಂಯ್ ಫುಲಾಂ ಝೆಲ್ಯಾಚೊ ಮಾನ್ ಭೆಟಯ್ಲೊ.
ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊ, ಅಧ್ಯಕ್ಷ್ ಲುವಿ ಪಿಂಟೊ, ಕಾರ್ಯದರ್ಶಿ ಕಿಶೋರ್ ಫೆರ್ನಾಂಡಿಸ್ ಆನಿ ಖಜನ್ದಾರ್ ಎಲ್ರೊನ್ ರೊಡ್ರಿಗಸ್ ಹಾಣಿಂ ಮಾನ್ ಭೆಟೊಂವ್ಚ್ಯಾ ಕಾರ್ಯಾಂತ್ ಸಾಂಗಾತ್ ದಿಲೊ.
ಕಾರ್ಯಾಚ್ಯೆ ಸುರ್ವೆರ್ ಆಯ್ಲೆವಾರ್ ದೆವಾಧಿನ್ ಜಾಲ್ಲ್ಯಾ ಮಾ.ಬಾ. ವಲೇರಿಯನ್ ಮೆಂಡೊನ್ಸಾ ಆನಿ ಪಂಚು ಬಂಟ್ವಾಳ್ ಹಾಂಕಾಂ ಶ್ರದ್ಧಾಂಜಲಿ ಅರ್ಪಿಲಿ. ಕೇರನ್ ಮಾಡ್ತಾನ್ ಕಾರ್ಯೆಂ ಸಾಂಬಾಳ್ಳೆಂ.
