ಸಿಂಗಾಪುರಾಂತ್ಲ್ಯಾ ಪ್ರತಿಷ್ಟಿತ್ ಅಂತರ್‌ಸಾಂಸ್ಕೃತಿಕ್ ನಾಟಕ್ ಅಧ್ಯಯನ್ ಸಂಸ್ಥ್ಯಾಚ್ಯಾ (Intercultural Theatre Institute) ತೀನ್ ವರ್ಸಾಂಚ್ಯಾ ವೃತ್ತಿಪರ್ ನಾಟಕ್ ತರ್ಬೆತಿಕ್ ಮಂಗ್ಳುರ್‍ಚ್ಯಾ ದೆರೆಬೈಲ್‌ಚೊ ಮನೀಷ್ ಪಿಂಟೊ ವಿಂಚುನ್ ಆಯ್ಲಾ. ಆಯ್ಲೆವಾರ್ ಹೈದರಾಬಾದಾಂತ್ ಚಲ್‌ಲ್ಲ್ಯಾ ಸಂದರ್ಶನಾಂತ್ ಹಿ ವಿಂಚೊವ್ಣ್ ಜಾಲಿ.
ಏಶಿಯಾಂತ್ಲ್ಯಾ ಪ್ರಮುಖ್ ಸಾಂಪ್ರದಾಯಿಕ್ ಕಲಾ ಪ್ರಕಾರ್ ಜಶೆಂ ಜಪಾನ್‌ಚೊ ನೊಹ್ ಥಿಯೆಟರ್, ಚಿನಾಚೊ ಬೀಜಿಂಗ್ ಒಪೆರಾ ಆನಿ ತೈ-ಚಿ, ಇಂಡೊನೇಶಿಯಾಚೊ ವಯಾಂಗ್ ವೊಂಗ್, ಭಾರತಾಚೊ ಕೂಡಿಯಾಟಂ ಆನಿ ಹೆರ್ ಪ್ರಕಾರಾಂಚಿ ಶಿಕೊವ್ಣ್ ಹ್ಯಾ ತರ್ಬೆತಿಂತ್ ಆಟಾಪ್ಲ್ಯಾ. ತಶೆಂಚ್ ಸಮಕಾಳೀನ್ ರಂಗ್‌ಮಾಂಚಿಯೆಚ್ಯಾ ಸಮಗ್ರ್ ಜಾಣ್ವಾಯೆ ಸವೆಂ ನಟನ್, ಆಂಗಿಕಾಭಿನಯ್, ತಾಳೊ ನಿಯಂತ್ರಣ್ ಆನಿ ನಾಟಕಾಕ್ ಲಗ್ತಿ ಜಾಲ್ಲೆ ತಾಂತ್ರಿಕ್ ಸಂಗ್ತಿಂ ವಿಶಿಂ ಶಿಕೊವ್ಣ್ ಆಸ್ತಲಿ. 2000 ಇಸ್ವೆಂತ್ ಸ್ಥಾಪನ್ ಜಾಲ್ಲ್ಯಾ ಹ್ಯಾ ಸಂಸ್ಥ್ಯಾಕ್ ಕರ್ನಾಟಕ ಥಾವ್ನ್ ಎದೊಳ್ ಮ್ಹಣಾಸರ್ ವಿಂಚುನ್ ಆಯಿಲ್ಲ್ಯಾಂ ಪಯ್ಕಿ ಮನೀಷ್ ತಿಸ್ರೊ.
.jpg)
.jpg)
.jpg)
.jpg)
ಕೊಂಕ್ಣೆಂತ್ಲಿ ಏಕ್ ಮಾತ್ರ್ ವೃತ್ತಿಪರ್ ನಾಟಕ್ ರೆರ್ಪಟರಿ - ಕಲಾಕುಲ್ ಹಾಂತುಂ ಸುರ್‍ವಿಲ್ಲಿ ತರ್ಬೆತಿ ಜೊಡ್‌ಲ್ಲ್ಯಾ ಮನೀಷಾಕ್, 2019ವ್ಯಾ ವರ್ಸಾಚೊ 'ಶ್ರೇಷ್ಠ್ ಕಲಾ ವಿದ್ಯಾರ್ಥಿ' ಪುರಸ್ಕಾರ್ ಲಾಬ್ಲಾ. 2022-23 ವ್ಯಾ ವರ್ಸಾ ರಾಷ್ಟ್ರೀಯ್ ನಾಟಕ್ ಶಾಳಾ (NSD) - ತ್ರಿಪುರಾ ಥಾವ್ನ್ ಸನದ್ ಜೊಡ್ಲ್ಯಾ. ಉಪ್ರಾಂತ್ ಮಣಿಪುರ್, ತ್ರಿಪುರಾ ಆನಿ ಕಾಶ್ಮೀರಾಂತ್ ಜಾಯ್ತಿಂ ನಾಟಕ್ ಕಾರ್ಯಗಾರಾಂ ಚಲಯ್ಲ್ಯಾಂತ್. ಎನ್.ಎಸ್.ಡಿ-ಚೆಂ ಅಂತರಾಷ್ಟ್ರೀಯ್ ನಾಟಕ್ ಫೆಸ್ತ್ 'ಭಾರತ್ ರಂಗ್ ಮಹೋತ್ಸವ್' ಹಾಂತುಂ ಭಾಗ್ ಘೆತ್ಲಾ. ಮನೀಷಾನ್ ಎದೊಳ್ ಕೊಂಕ್ಣಿ, ಕನ್ನಡ, ತುಳು, ಹಿಂದಿ ಭಾಸಾಂನಿ ವಿಸಾಚ್ಯಾಕೀ ಚಡ್ ನಾಟಕಾಂನಿ ನಟನ್ ಕೆಲಾಂ ಆನಿ ಚ್ಯಾರ್ ನಾಟಕಾಂಕ್ ನಿರ್ದೇಶನ್ ದಿಲಾಂ.
