News Update

ಮಾಂಡ್ ಸೊಭಾಣ್ ಆನಿ ಗ್ಲೋಬಲ್ ಕೊಂಕ್ಣಿ ಫೊರಮ್, ಗೊಂಯ್ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಕೊಂಕ್ಣೆಚ್ಯಾ ಸರ್ವ್ ಲಿಪಿಂಕ್ ಮಾನ್: ಆಟೊವ್ ಆನಿ ವಾವ್ರಾ ಯೆವ್ಜಣ್ ಹಾಚೆರ್ ಏಕ್ ವಿಚಾರ್ ಸಾತೆಂ 29.09.24 ವೆರ್ ಕಲಾಂಗಣಾಂತ್ ಮಾಂಡುನ್ ಹಾಡುಲ್ಲೆಂ.

ಮಾಂಡ್ ಸೊಭಾಣ್ ಗುರ್ಕಾರ್ ಆನಿ ಹ್ಯಾ ಗಜಾಲಿಚೆರ್ ಝುಜ್ ಮಾಂಡುಲ್ಲ್ಯಾ ಎರಿಕ್ ಒಝೇರಿಯೊನ್ ಸಭಾ ಚಲೊವ್ನ್ ವೆಲಿ. ರೋಮಿ ಲಿಪಿಚ್ಯಾ ಹಕ್ಕಾ ಖಾತಿರ್ ಪಾಟ್ಲ್ಯಾ ಜಾಯ್ತ್ಯಾ ತೆಂಪಾ ಥಾವ್ನ್ ಕೆಲ್ಲ್ಯಾ ವಾವ್ರಾ ವಿಶ್ಯಾಂತ್ ಗ್ಲೋಬಲ್ ಕೊಂಕ್ಣಿ ಫೊರಮ್ ಹಾಚೊ ಅಧ್ಯಕ್ಷ್ ಕೆನೆಡಿ ಆಫೊನ್ಸೊ ಹಾಣೆಂ ದಾಖ್ಲ್ಯಾಂ ಸವೆಂ ಸವಿಸ್ತಾರ್ ಮಾಹೆತ್ ದಿಲಿ. ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಸ್ಟ್ಯಾನಿ ಆಲ್ವಾರಿಸ್ ಉಲೊವ್ನ್, ಕರ್ನಾಟಕ ರಾಜ್ಯ್ ಸರ್ಕಾರಾಚ್ಯಾ ಮಾಂತಾಖಾಲ್ ಆಸ್ಚ್ಯಾ ಸ ಭಾಷಾ ಆಕಾಡೆಮಿಂನಿ ಆಯ್ಲೆವಾರ್ ಬೆಂಗ್ಳುರಾಂತ್ ಮೆಳುನ್ ಕರ್ನಾಟಕಾಂತ್ ಕನ್ನಡ ಲಿಪಿಂತ್ ಆಸ್ಚ್ಯಾ ಸಾಹಿತ್ಯಾಕ್ ಪಯ್ಲಿ ಆದ್ಯತಾ ದೀಜೆ ಆನಿ ಕೇಂದ್ರ್ ಸಾಹಿತ್ಯ್ ಆಕಾಡೆಮಿನ್ ಕನ್ನಡ ಲಿಪಿಂತ್ ಆಸ್ಚ್ಯಾ ಕೊಂಕ್ಣಿ ಸಾಹಿತ್ಯಾಕ್‌ಯೀ ನಾಗರಿ ಲಿಪಿ ಬರಾಬರ್ ಮಾನ್ ದಿಂವ್ಚೆ ವಿಶಿಂ ಒತ್ತಡ್ ಘಾಲಿಜೆ ಮ್ಹಣ್ ಠರಾವ್ ಘೆತ್ಲಾ, ಅಶೆಂ ಕಳಯ್ಲೆಂ.

ಉಪ್ರಾಂತ್ ಚರ್ಚಾ ಚಲ್ಲಿ. ದೊತೊರ್ ಚಾರ್ಲ್ಸ್ ಲೋಬೊ, ಜುಜೆ ಫೆರ್ನಾಂಡಿಸ್, ಸ್ಟೀವನ್ ಕ್ವಾಡ್ರಸ್, ಹೇಮಾಚಾರ್ಯ, ರೊನಿ ಆರುಣ್, ಮಾಚ್ಚಾ ಮಿಲಾರ್, ಜೋನ್ ಮೊನಿಸ್, ಫ್ರೆಡ್ರಿಕ್ ನೊರೊನ್ಹಾ, ಡೊನಾಲ್ಡ್ ಪಿರೇರಾ, ವಿಕಾಸ್ ಕಲಾಕುಲ್, ಕ್ಲ್ಯಾರಾ ವಾಸ್ ಹಾಣಿಂ ಆಪ್ಲಿ ಅಭಿಪ್ರಾಯ್ ಉಚಾರ್‍ಲಿ. ಉಪ್ರಾಂತ್ ಠರಾವ್ ಮಾಂಡ್ಲೊ.

ಸಭಾ ಚಲಯ್ಣಾರ್ ಎರಿಕ್ ಒಝೇರಿಯೊನ್ ಸಭೆಚೊ ನಿರ್ಣಯ್ ಮಂಡನ್ ಕರುನ್ ಕಾರ್ಯಾಕ್ ಸಂಪ್ಣಿ ದಿಲಿ. ಸಭೆಚೊ ಠರಾವ್ ಹೆ ಪರಿಂ ಆಸಾ. 'ಏಕ್ ಭಾಸ್, ಏಕ್ ಲಿಪಿ' ಮ್ಹಣ್ಲೊ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚೊ ಠರಾವ್ ವಿರೋಧ್ ಕರ್ಚೊ ಆನಿ ಸರ್ಕಾರಾಕ್ ನಾಗರಿ ಬರಾಬರ್ ಕನ್ನಡ ಆನಿ ರೊಮಿ ಲಿಪಿಯೆಂಕ್ ಸಮಾನ್ ಮಾನ್ ಜೊಡುನ್ ದೀಂವ್ಕ್ ದಬಾವ್ ಘಾಲ್ಚೊ. ಹ್ಯೆ ದಿಶೆನ್ ಗರ್ಜ್ ಆಸ್ಚೊ ಸರ್ವ್ ಕಾನೂನಾತ್ಮಕ್ ಆನಿ ಹೆರ್ ವಾವ್ರ್ ಕರ್‍ಚೊ.

ಸಭೆನ್ ಹೊ ವಾವ್ರ್ ಮುಖಾರುನ್ ವರುಂಕ್ ಗ್ಲೋಬಲ್ ಕೊಂಕಣಿ ಫೋರಮ್ ಅಧ್ಯಕ್ಷ್ ಕೆನಡಿ ಆಫೊನ್ಸೊ ಹಾಚ್ಯಾ ಮುಖೆಲ್ಪಣಾಚಿ ಕಾರ್ಯಕಾರಿ ಸಮಿತಿ ವಿಂಚುನ್ ಕಾಡ್ಲಿ. ಗೊಂಯಾಂ ಥಾವ್ನ್ ಜುಜೆ ಸಾಲ್ವದೊರ್ ಫೆರ್ನಾಂಡಿಸ್, ಆಪ್ಲೊನಿಯಾ ರೆಬೆಲ್ಲೊ, ಲೂಯಿಸ್ ಝೇವಿಯರ್ ಮಸ್ಕರೇನ್ಹಸ್, ಕ್ರೂಜ್ ಮಾರಿಯೊ ಪಿರೇರಾ, ಮೈಕಲ್ ಜ್ಯೂಡ್ ಗ್ರೇಶಿಯಸ್, ಆಂಟೊನಿಯೊ ಆಲ್ವಾರಿಸ್ ಆನಿ ಡೊಮಿನಿಕ್ ಫೆರ್ನಾಂಡಿಸ್ ಆನಿ ಮಂಗ್ಳುರ್ ಥಾವ್ನ್ ಎರಿಕ್ ಒಝೇರಿಯೊ, ಲುವಿ ಪಿಂಟೊ, ಸ್ಟ್ಯಾನಿ ಆಲ್ವಾರಿಸ್, ರಿಚಾರ್ಡ್ ಮೊರಾಸ್, ಸ್ಟೀವನ್ ಕ್ವಾಡ್ರಸ್ ಆನಿ ಡೊನಾಲ್ಡ್ ಪಿರೇರಾ ಆಸ್ತಲೆ. ಹ್ಯಾ ಜಮಾತೆಕ್ ಕರ್ನಾಟಕ ಆನಿ ಗೊಂಯಾಂ ಥಾವ್ನ್ 60 ಆಸಕ್ತ್ ವಂತಾಂನಿ ಭಾಗ್ ಘೆತ್ಲೊ.