News Update

ಮಾಂಡ್ ಸೊಭಾಣಾನ್ ವರ್ಸಾವಾರ್ ಚಲೊಂವ್ಚ್ಯಾ ಭುರ್ಗ್ಯಾಂಚ್ಯಾ ರಜೆ ಶಿಬಿರಾಕ್ ವಿಂಚೊವ್ಣ್ ಕಲಾಂಗಣಾಂತ್ 12.04.25 ವೆರ್ ಚಲ್ಲಿ. ಶಿಬಿರ್ ಸಂಯೋಜಕ್ ಅರುಣ್ ರಾಜ್ ರೊಡ್ರಿಗಸ್ ಹಾಣೆಂ ಶಿಬಿರಾವಿಶಿಂ, ಶಿಬಿರಾಂತ್ ಶಿಕೊಂವ್ಚ್ಯಾ ಗಜಾಲಿಂವಿಶಿಂ, ಶಿಬಿರಾಚ್ಯಾ ಶಿಸ್ತೆವಿಶಿಂ ಮಾಹೆತ್ ದಿಲಿ. ಅಧ್ಯಕ್ಷ್ ಲುವಿ ಪಿಂಟೊ ಆನಿ ಸಾಂದೆ ಕಿಶೋರ್ ಫೆರ್ನಾಂಡಿಸ್, ನವೀನ್ ಲೋಬೊ, ರೊನಿ ಕ್ರಾಸ್ತಾ ಹಾಜರ್ ಆಸ್ಲಲೆ.

ಹರ್ಯೆಕಾ ವಿಭಾಗಾಂತ್ 20 ಜಣಾಂಕ್ ಆವ್ಕಾಸ್ ಆಸುನ್ , ರೈನಾ ಸಿಕ್ವೇರಾನ್ ಗಾಯಾನ್ ವಿಭಾಗ್, ವಿಕಾಸ್ ಕಲಾಕುಲ್ ನಾಟಕ್ ವಿಭಾಗ್ ಆನಿ ರಾಹುಲ್ ಪಿಂಟೊನ್ ನಾಚ್ ವಿಭಾಗಾಂತ್ ವಿಂಚೊವ್ಣ್ ಕೆಲಿ. ಸರ್ವ್ ಭುರ್ಗ್ಯಾಂಕ್ ಕೊಂಕ್ಣಿ ಭಾಸ್, ಭಾಷಣ್, ಕಾರ್ಯೆಂ ನಿರ್ವಹಣ್, ಟಿವಿ ನಿರೂಪಣ್ ಅಶೆಂ ಜೆರಾಲ್ ಶಿಕಪ್ ಲಾಭ್ತಲೆಂ.

ಶಿಬಿರ್ ನಿರ್ದೇಶಕ್ ಎರಿಕ್ ಒಝೇರಿಯೊಚ್ಯಾ ನಿರ್ದೇಸ್ ಪಣಾಖಾಲ್ ಆನಿ ನೊರೀನ್ ಮೆಂಡೊನ್ಸಾ ಮುಂಬಯ್ ಹಿಚ್ಯಾ ಗೌರವಾರ್ಥ್ ಎಪ್ರಿಲ್ 25 ಥಾವ್ನ್ ಮಾಯ್ 04 ಪರ್ಯಾಂತ್ ಹೆಂ ಕಾಜಳ್ ಶಿಬಿರ್ ಚಲ್ತಲೆಂ. ಹ್ಯಾ ವಸ್ತೆ ಶಿಬಿರಾಂತ್ ಭುರ್ಗ್ಯಾಂನಿ ಶಿಕ್ಲಲೆಂ, ಮಾಯ್ 04 ವೆರ್ ಸಾದರ್ ಜಾಂವ್ಚ್ಯಾ 281 ವ್ಯೆ ಮ್ಹಯ್ನ್ಯಾಳ್ಯೆ ಮಾಂಚಿಯೆರ್ ಸಾದರ್ ಕರ್ತಲಿಂ.  

1999 ಇಸ್ವೆಂತ್ ಭುರ್ಗ್ಯಾಂಚಿಂ ತಾಲೆಂತಾಂ ಪರ್ಜಳಾಂವ್ಕ್  ಆನಿ ಕೊಂಕ್ಣಿ ಜಿವಾಳಾಂವ್ಕ್ ಮಾಂಡ್ ಸೊಭಾಣಾನ್ ಹ್ಯಾ ವಸ್ತೆ ಶಿಬಿರಾಚಿ ಸುರ್ವಾತ್ ಕೆಲ್ಲಿ. ಆತಾಂ ಚವಿಸಾವ್ಯಾ ವರ್ಸಾಂತ್ ಆಸ್ಚ್ಯಾ ಹ್ಯಾ ಶಿಬಿರಾಂತ್ (ಕೊರೊನಾ ಕಾಳಾರ್ ದೋನ್ ವರ್ಸಾಂ ಸೊಡ್ನ್ ) ಹರ್ ವರ್ಸಾಂ 60-70 ಭುರ್ಗ್ಯಾಂಕ್ ತರ್ಬೆತಿ ದಿಲ್ಯಾ. ಹ್ಯಾ ಶಿಬಿರಾಂನಿ ತರ್ಬೆತಿ ಜೊಡ್ಲಲಿಂ ಸಬಾರ್ ಭುರ್ಗಿಂ ಆಜ್ ಸಾದರ್ ಕಲಾ ಸಂಸಾರಾಂತ್ ವ್ಹಡ್ ನಾಂವ್ ಜೊಡುಂಕ್ ಪಾವ್ಲ್ಯಾಂತ್.