News Update

ಆಜ್ ಗಾಂವಾರ್ ಧಾರ್ಮಿಕ್ ತಶೆಂ ಸಾಂಸ್ಕೃತಿಕ್ ಜಾಯ್ತಿಂ ಕಾರ್ಯಿಂ. ಮೊಡಾಂ ಆಪಾಲಿಪಾ ಖೆಳುನ್ ಘಾಮಾಚೊ ಪಾವ್ಸ್ ವ್ಹಾಳಯ್ತಾನಾ, ಘರಾಚ್ ಬಶ್ಯಾಂ ಮ್ಹಣ್ ಜಾಂವ್ಚ್ಯಾ ವಗ್ತಾ ಕಲಾಂಗಣಾಕ್ ಆಯಿಲ್ಲ್ಯಾ ಎಸ್ ಬಿ ಜಿ ಟ್ರಾವೆಲ್ಸ್ ರೂಟ್ ನಂಬರ್ – 2 ಬಸ್ಸಾರ್ ಕಂಡಾಪಟ್ಟೆ ಗಡ್ದಿ ಜಾಲಿ. ಬಸ್ಕೆಚ್ಯಾಕೀ ಚಡ್ ಲೋಕ್ ಆಸುಲ್ಲೊ. ಆಡೇಜ್ ವರಾಂಚೆಂ ಪಯ್ಣ್ ಸಬಾರಾಂನಿ ಉಬೆಂ ರಾವುನ್ ಚ್ ಕೆಲೆಂ.

ಕಲಾಂಗಣಾಂತ್ 280 ವಿ ಮ್ಹಯ್ನ್ಯಾಳಿ ಮಾಂಚಿ 06.04.2025 ವೆರ್ ಸಾಂಜೆರ್ 6.30 ವೊರಾರ್ ಸುರ್ವಾತ್ತಚ್, ಆಯ್ಲೆವಾರ್ ಅಮೇರಿಕಾ ಥಾವ್ನ್ ಪೈಲೆಟ್ ಪದ್ವಿ ಜೊಡುನ್ ಆಯ್ಲಲೊ ಮಾಂಡ್ ಪಂಗ್ಡಾಚೊ ಸಾಂದೊ ರೆನಾಲ್ಡ್ ಡೆಕ್ಸ್ಟರ್ ಹೆನ್ರಿ ಲೋಬೊ ಹಾಣೆಂ ಘಾಂಟ್ ವ್ಹಾಜೊವ್ನ್ ಕಾರ್ಯಾಕ್ ಚಲಾವಣ್ ದಿಲೆಂ. ತಾಕಾ ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊ, ಅಧ್ಯಕ್ಷ್ ಲುವಿ ಪಿಂಟೊ, ಕಾರ್ಯದರ್ಶಿ ಕೇರನ್ ಮಾಡ್ತಾ ಆನಿ ಖಜಾನಿ ಎಲ್ರೊನ್ ರೊಡ್ರಿಗಸ್ ಹಾಣಿಂ ಸಾಂಗಾತ್ ದಿಲೊ.

ಏಕ್ ಬಸ್ ಉದ್ಯಮಿಚೆಂ ಕುಟಮ್ ಆನಿ ಭೊಂವಾರಾಂತ್ ಘಡ್ಚಿ ಕಾಣಿ, ವೆವೆಗ್ಳಿಂ ಕುಸಾಂ ಘೆತಾನಾ, ಕುಸಳಾಂ ದುಕ್ಲಿಂ. ದುಭಾವಾಚಿಂ ಸೊರ್ಮುಣಾಂ ಪೆಟ್ಲಿಂ, ಭೊಗ್ಣಾಂನಿ ಕಾಳ್ಜಾಕ್ ಖರ್ವಣಾಂ ಘಾಲಿಂ. ರೂಟ್ ನಂಬರ್ -2 ತ್ಲ್ಯೊ ಗಮ್ಮತ್ ಗಜಾಲಿ ಆನಿ ಎಕಾ ವಿಶೇಸ್ ಆನಿ ವಿಪ್ರೀತ್ ಲವ್ ಸ್ಟೋರಿನ್ ಲೊಕಾಕ್ ಖೂಬ್ ಹಾಸಯ್ಲೆಂ.

ನೆಲ್ಲು ಪೆರ್ಮನ್ನೂರ್, ಲ್ಯಾನ್ಸಿ ಬಂಟ್ವಾಳ್, ಸಂದೀಪ್ ಮಸ್ಕರೇನ್ಹಸ್, ದೀಪಕ್ ಕುಟಿನ್ಹಾ, ಮರಿಯಾ ಜೊಯ್ಸ್, ಜಾಸ್ಮಿನ್ ಡಿಸೋಜ, ಅಸುಂತಾ ಪಾಯ್ಸ್, ಜೊಯೆಲ್ ಪಿಂಟೊ, ಗ್ಲೆರನ್ ವಾಸ್, ಕೇತನ್ ರೊಡ್ರಿಗಸ್ ಸರ್ವಾಂಚೆಂ ನಟನ್ ಅಪುರ್ಬಾಯೆಚೆಂ ಆಸ್ಲಲೆಂ.

ತಾಳೆ ಆನಿ ಸಂಗೀತ್ ವನಿಲ್ ವೇಗಸ್, ಉತ್ರಾಂ ವಿಲ್ಸನ್ ಕಟೀಲ್, ಪಾಠ್ ಥಳ್ ಸಂಗೀತ್ ರವೀನ್ ಮಾರ್ಟಿಸ್ ಆನಿ ಜೆ ಪಿ ತೂಮಿನಾಡು ಹಾಚ್ಯಾ ಕಾಣಿಯೆಕ್ ಕೊಮಿಡಿ ಡೋಸ್ ಭರ್ನ್, ರಂಗ್ ಪಾಠ್ ರಚನ್ ಆನಿ ನಿರ್ದೇಶನ್ ನೆಲ್ಲು ಪೆರ್ಮನ್ನೂರ್ ಹಾಚೆಂ. ಲೊಕಾಂನಿ ಚಿಂತುನ್ ಚಿಂತುನ್ ಹಾಸುನ್ ಹಾಸುನ್ ಪಾಟಿಂ ವೆಚೆ ತಸಲೊ ಏಕ್ ಅಪ್ರುಪಾಯೆಚೊ ನಾಟಕ್ ಪಳೆಲ್ಲಿ ಖುಶಿ ಜಣಾಂಕ್ ಮೆಳ್ಳಿ.